Vísita, quǽsumus, Dómine, habitatiónem istam, et omnes insídias inimíci ab ea longe repélle; ángeli tui sancti hábitent in ea, qui nos in pace custódiant; et benedíctio tua sit super nos semper. Per Christum Dóminum nostrum. Amen.

Illúmina, quǽsumus, Dómine Deus, ténebras nostras, et totíus noctis insídias tu a nobis repélle propítius. Per Christum Dóminum nostrum. Amen.

Omnípotens Deus, te supplíciter exorámus, ut ad claustra córporis nostri pervígiles stent ángeli tui sancti, et nos fámulos tuos quies tua recréet ac refíciat, benedíctio tua prótegat et deféndat. Per Christum Dóminum nostrum. Amen.