Dixit insípiens in corde suo: "Non est Deus." Corrúpti sunt et abominábiles facti sunt in iniquitátibus; non est qui fáciat bonum.

Dóminus de cælo prospéxit super fílios hóminum, ut vídeat si est intéllegens, requírens Deum.

Omnes declinavérunt, simul corrúpti sunt; non est qui fáciat bonum, non est usque ad unum.

Nonne cognóscent omnes, qui operántur iniquitátem, qui dévorant plebem meam ut cibum panis? Dóminum non invocavérunt.

Illic trepidavérunt timóre, quóniam Deus in generatióne iusta est.

Consílium ínopis confúsum est, quóniam Dóminus spes eius est.

Quis dabit ex Sion salutáre Israël? Cum convérterit Dóminus captivitátem plebis suæ, exsultábit Iacob et lætábitur Israël.