Omnes gentes, pláudite mánibus; iubiláte Deo in voce exsultatiónis.

Quóniam Dóminus Altíssimus, terríbilis, Rex magnus super omnem terram.

Subiécit pópulos nobis et gentes sub pédibus nostris.

Elégit nobis hereditátem nostram, glóriam Iacob, quem diléxit.

Ascéndit Deus in iubilatióne, Dóminus in voce tubæ.

Psállite Deo, psállite; psállite Regi nostro, psállite.

Quóniam Rex omnis terræ Deus; psállite sapiénter.

Regnávit Deus super gentes; Deus sedet super sedem sanctam suam.

Príncipes populórum congregáti sunt cum pópulo Dei Abraham, quóniam Dei sunt scuta terræ; veheménter elevátus est.