Annuntiávi iustítiam in ecclésia magna; ecce lábia mea non cohíbui, Dómine, tu scis.

Iustítiam tuam non abscóndi in corde meo; veritátem tuam et salutáre tuum dixi; non celávi misericórdiam tuam et veritátem tuam a concílio multo.

Tu autem, Dómine, ne longe fácias miseratiónes tuas a me; misericórdia tua et véritas tua semper susceperúnt me.

Quóniam circumdedérunt me mala, quorum non est númerus; comprehendérunt me iniquitátes meæ, et non pótui ut vidérem. Multiplicátæ sunt super capíllos cápitis mei, et cor meum derelíquit me.

Compláceat tibi, Dómine, ut éruas me; Dómine, ad adiuvándum me réspice.

Exsúltent et laeténtur super te omnes quæréntes te et dicant semper: "Magnificétur Dóminus!", qui díligunt salutáre tuum.

Ego autem mendícus sum et pauper; Dóminus sollícitus est mei. Adiútor meus et liberátor meus tu es; Deus meus, ne tardáveris.