Exspéctans exspectávi Dóminum, et inténdit mihi.

Et exaudívit clamórem meum et edúxit me de lacu misériæ et de luto fæcis. Et státuit super petram pedes meos et diréxit gressus meos.

Et immísit in os meum cánticum novum, carmen Deo nostro. Vidébunt multi et timébunt et sperábunt in Dómino.

Beátus vir qui pósuit Dóminum spem suam et non respéxit in vanitátes et insánias mendáces.

Multa fecísti tu, Dómine Deus meus, mirabília tua, et cogitatiónibus tuis erga nos non est qui comparétur tibi. Annuntiáre et loqui vólui: multiplicáti sunt super númerum.

Sacrifícium et oblatiónem noluísti; aures autem perfecísti mihi. Holocáustum et pro peccáto non postulásti;

tunc dixi: "Ecce vénio. In volúmine libri scriptum est de me:

Fácere voluntátem tuam, Deus meus, vólui, et lex tua in médio cordis mei."