Noli æmulári in maleficiéntibus, neque zeláveris faciéntes iniquitátem,

quóniam tamquam fænum velóciter arescent et quemádmodum olera hérbæ cito décident.

Spera in Dómino et fac bonum; inhábita terram et pásce fidem.

Delectáre in Dómino, et dabit tibi petitiónes cordis tui.

Revéla Dómino viam tuam et spera in eo, et ipse fáciet.

Et edúcet quasi lumen iustítiam tuam et iudícium tuum tamquam merídiem.

Subditus esto Dómino et exspécta eum; noli æmulári in eo qui prosperátur in via sua, in hómine, qui facit dolos.

Désine ab ira et derelínque furórem; noli æmulári, ne fácias malum.

Quóniam qui maligántur exterminabúntur; qui autem exspéctant Dóminum, ipsi hereditábunt terram.

Et adhuc pusíllum, et non erit peccátor; et quæres locum eius, et non invénies.

Mansuéti autem hereditábunt terram et delectabúntur in multitúdine pacis.