Dómine Deus meus, in te sperávi; salvum me fac ex ómnibus persequéntibus me et líbera me,

ne quando rápiat ut leo ánimam meam, lacérans et non sit qui éruat.

Dómine Deus meus, si feci istud, si est iníquitas in mánibus meis,

si réddidi retribuéntibus mihi mala, si exspoliávi hostes meos inaniter:

persequátur inimícus ánimam meam et comprehéndat et concúlcet in terra vitam meam et glóriam meam in púlverem dedúcat.

Exsúrge, Dómine, in ira tua; exaltáre in fínibus inimicórum meórum et exsúrge, Dómine Deus meus, in præcépto, quod mandásti.

Et congregátio populórum circúmdet te, et super eam in altum regrédere.

Dóminus iúdicat pópulos. Iúdica me, Dómine, secúndum iustítiam meam et secúndum innocéntiam meam super me.