Quid gloriáris in malítia, qui potens es in iniquitáte?

Tota die insídias cógitat lingua tua; sicut novácula acúta fecísti dolum.

Dilexísti malítiam super benignitátem, iniquitátem magis quam loqui æquitátem.

Dilexísti ómnia verba ad devorándum, lingua dolósa.

Proptérea Deus déstruet te in finem; evéllet te et emígrábit te de tabernáculo tuo et radícem tuam de terra vivéntium.

Vidébunt iusti et timébunt et super eum ridébunt:

"Ecce homo, qui non pósuit Deum adiutórem suum, sed sperávit in multitúdine divitiárum suárum et invaluit in insídiis suis."

Ego autem sicut olíva viréscens in domo Dei; sperávi in misericórdia Dei in ætérnum et in sǽculum sǽculi.

Confitébor tibi in sǽculum, quia fecísti; et exspectábo nomen tuum, quóniam bonum est, in conspéctu sanctórum tuórum.