Iúdica, Dómine, nocéntes me; expúgna impugnántes me.

Apprehénde arma et scutum et exsúrge in adiutórium mihi.

Effúnde frámëam et conclúde advérsus eos qui persequúntur me; dic ánimæ meæ: "Salus tua ego sum."

Confundántur et revereántur qui quærunt ánimam meam; avertántur retrórsum et confundántur qui cógitant mihi mala.

Fiant tamquam pulvis ante fáciem venti et ángelus Dómini impéllens;

fiat via eórum ténebræ et lúbricum, et ángelus Dómini pérsequens eos.

Quóniam gratis abscondérunt mihi intéritum laquéi sui; sine causa fodérunt fóveam ánimæ meæ.

Véniat illi ruína, quam ignórat, et rete, quod abscóndit, comprehéndat eum et in ruínam cadat in ipsum.

Ánima autem mea exsultábit in Dómino et delectábitur super salutári suo.