Deus, áuribus nostris audívimus, patres nostri narravérunt nobis opus, quod operátus es in diébus eórum, in diébus antíquis.

Tu manu tua gentes disperdidísti et plantásti eos; afflixísti pópulos et expulísti eos.

Nec enim in gládio suo possedérunt terram, et bráchium eórum non salvávit eos, sed déxtera tua et bráchium tuum et illuminátio vultus tui, quóniam complacuísti in eis.

Tu es ipse rex meus, Deus; manda salútes Iacob.

In te inimícos nostros ventilábimus, et in nómine tuo conculcábimus insurgéntes in nos.

Non enim in arcu meo sperábo, et gládius meus non salvábit me,

sed salvásti nos ex affligéntibus nos et eos, qui nos odérunt, confudísti.

In Deo gloriábimur tota die et nómini tuo confitébimur in sǽculum.