Et initiáti sunt Beélphegor et comedérunt sacrifícia mortuórum.

Et irritavérunt eum in adinventiónibus suis, et irruit in eos ruína.

Et stetit Phínees et iudicávit, et cessávit quassátio.

Et reputátum est ei in iustítiam in generatiónem et generatiónem usque in sempitérnum.

Et irritavérunt eum ad aquas Contradictiónis, et vexátus est Móyses propter eos,

quia exacerbavérunt spíritum eius, et distinxit lábiis suis.

Non disperdidérunt gentes, quas dixit Dóminus illis,

et commíxti sunt inter gentes et didicérunt ópera eórum

et serviérunt sculptílibus eórum, et factum est illis in scándalum.

Et immolavérunt fílios suos et fílias suas dæmóniis.

Et effudérunt sánguinem innocéntem, sánguinem filiórum suórum et filiárum suárum, quas sacrificavérunt sculptílibus Chánaan. Et infécta est terra sanguínibus,

et contaminári sunt in opéribus suis et fornicáti sunt in adinventiónibus suis.

Et irátus est furóre Dóminus in pópulum suum et abominátus est hereditátem suam.

Et trádidit eos in manus géntium, et domináti sunt eórum, qui odérant eos.

Et tribulavérunt eos inimíci eórum, et humiliáti sunt sub mánibus eórum.