Dixit insípiens in corde suo: "Non est Deus." Corrúpti sunt et abominábiles facti sunt in iniquitáte; non est qui fáciat bonum.

Deus de cælo prospéxit super fílios hóminum, ut vídeat si est intéllegens, si est requírens Deum.

Omnes declinavérunt, simul corrupti sunt; non est qui fáciat bonum, non est usque ad unum.

Nonne scient omnes, qui operántur iniquitátem, qui dévorant plebem meam ut cibum panis? Deum non invocavérunt.

Illic trepidavérunt timóre, ubi non erat timor, quóniam Deus dissipávit ossa eórum, qui tibi placébant; confúsi sunt, quóniam Deus sprévit eos.

Quis dabit ex Sion salutáre Israël? Cum convérterit Deus captivitátem plebis suæ, exsultábit Iacob, lætábitur Israël.