Salvum me fac, Dómine, quóniam defécit sanctus, quóniam deminútæ sunt veritátes a fíliis hóminum.

Vana locúti sunt unusquísque ad próximum suum; lábiis dolósis, in corde et corde locúti sunt.

Dispérdat Dóminus univérsa lábia dolósa et linguam magníloquam.

Qui dixérunt: "Linguam nostram magnificábimus, lábia nostra a nobis sunt; quis noster dóminus est?"

"Propter misériam ínopum et gémitum páuperum nunc exsúrgam, dicit Dóminus; ponam in salutári; fiduciáliter agam in eo."

Elóquia Dómini elóquia casta, argéntum igne examinátum, terræ purgátum séptuplum.

Tu, Dómine, servábis nos et custódies nos a generatióne hac in ætérnum.

In circúitu ímpii ámbulant, cum exaltáta fúerit ignomínia inter fílios hóminum.