Éripe me, Dómine, ab hómine malo; a viro violénto éripe me.

Qui cogitavérunt malítias in corde, tota die constituébant prǽlia.

Acuérunt linguas suas sicut serpéntis; venénum áspidum sub lábiis eórum.

Custódi me, Dómine, de manu peccatóris; a viris violéntis éripe me, qui cogitavérunt supplantáre gressus meos.

Abscondérunt supérbi láqueum mihi et funes; expandérunt rete secus iter, offendícula posuérunt mihi.

Dixi Dómino: «Deus meus es tu; exáudi, Dómine, vocem deprecatiónis meæ».

Dómine, Dómine, virtus salútis meæ, obumbrásti super caput meum in die belli.

Ne tráddas, Dómine, desidéria peccatóri; cogitátum eius ne promóveas.

Caput circúitus eórum: labor labiórum ipsórum opériet eos.

Cadent super eos carbónes; in ignem deícies eos, in fóveas, de quibus non resúrgent.

Vir linguósus non dirigétur in terra; virum violéntum mala cápient in extérminium.

Cognóvi quia fáciet Dóminus iudícium ínopis et vindíctam páuperum.