Dómine, non confúndar, quóniam invocávi te; erubéscant ímpii, obmutéscant in inférno.

Muta fiant lábia dolósa, quæ loquúntur advérsus iustum iniquitátem in supérbia et contémptu.

Quam magna multitúdo dulcédinis tuæ, Dómine, quam abscondísti timéntibus te, quam operátus es speréntibus in te in conspéctu filiórum hóminum!

Abscóndes eos in abscóndito faciéi tuæ a perturbatióne hóminum; próteges eos in tabernáculo a contradictióne linguárum.

Benedíctus Dóminus, quóniam mirificávit misericórdiam suam mihi in civitáte muníta.

Ego autem dixi in pavóre meo: "Proiéctus sum a conspéctu oculórum tuórum." Verúmtamen exaudísti vocem deprecatiónis meæ, cum clamárem ad te.

Dilígite Dóminum, omnes sancti eius; fidéles servat Dóminus et retríbuit abundánter faciénti supérbiam.

Virilíter ágite, et confortétur cor vestrum, omnes qui sperátis in Dómino.