Miserére mei, Dómine, quóniam tríbulor; contabéscit in dolóre óculus meus, ánima mea et venter meus.

Quóniam defécit in dolóre vita mea et anni mei in gemítibus; infirmáta est in afflictióne virtus mea, et ossa mea contabuérunt.

Propter omnes inimícos meos factus sum oppróbrium et vicínis meis valde et timor notis meis; qui vidébant me foris fugiébant a me.

Oblítus sum tamquam mórtuus a corde; factus sum tamquam vas pérditum.

Quóniam audívi vituperatiónem multórum; terror úndique, dum convéniunt simul advérsum me; áuferre ánimam meam consiliáti sunt.

Ego autem in te sperávi, Dómine; dixi: "Deus meus es tu;

in mánibus tuis sortes meæ." Éripe me de manu inimicórum meórum et a persequéntibus me.

Illústra fáciem tuam super servum tuum; salvum me fac in misericórdia tua.