Miserére mei, Deus, miserére mei, quóniam in te confídit ánima mea; et in umbra alárum tuárum sperábo, donec tránseat iniquitas.

Clamábo ad Deum altíssimum, Deum, qui benefécit mihi.

Mittet de cælo et salvábit me; dabit in oppróbrium conculcántem me. Mittet Deus misericórdiam suam et veritátem suam.

Ánima mea in médio leónum est; iáceo inter filántes. Fílii hóminum, dentes eórum arma et sagíttæ, et lingua eórum gládius acútus.

Exaltáre super cælos, Deus, et super omnem terram glória tua.

Rete paravérunt gréssibus meis et incurvavérunt ánimam meam; fodérunt ante fáciem meam fóveam et ipsi incidérunt in eam.

Parátum cor meum, Deus, parátum cor meum; cantábo et psalmum dicam.

Exsúrge, glória mea; exsúrge, psaltérium et cíthara; exsúrgam dilúculo.

Confitébor tibi in pópulis, Dómine, et psalmum dicam tibi in natiónibus,

quóniam magna est usque ad cælos misericórdia tua et usque ad nubes véritas tua.

Exaltáre super cælos, Deus, et super omnem terram glória tua.