Consérva me, Dómine, quóniam sperávi in te.

Dixi Dómino: "Dóminus meus es tu, bonum mihi non est sine te."

Sanctis, qui sunt in terra eius, miríficis: omnis volúntas mea in eis.

Multiplicabúntur dolóres eórum, qui post álium currunt. Non effúndam libatiónes eórum de sánguine nec assúmam nómina eórum in lábiis meis.

Dóminus pars hereditátis meæ et cálicis mei; tu es qui restítues hereditátem meam mihi.

Funes cecidérunt mihi in præcláris; étenim heréditas mea præclára est mihi.

Benedícam Dóminum qui tríbuit mihi intelléctum; ínsuper et usque ad noctem increpuérunt me renes mei.

Providébam Dóminum in conspéctu meo semper, quóniam a dextris est mihi, ne commóvear.

Propter hoc lætátum est cor meum, et exsultávit lingua mea; ínsuper et caro mea requiéscet in spe.

Quóniam non derelínques ánimam meam in inférno nec dabis sanctum tuum vidére corruptiónem.

Notas mihi fácies vias vitæ; plenitúdo lætítiæ cum vultu tuo, delectatiónes in déxtera tua usque in finem.